２月２４日　　第４次返工 
今日有咗小小进展，结果自己又突然开心翻。虽然，I姐姐都仍然好钟意话我，但是，她真是教识我嘢咯。退一步谂，BIBI虽然都对我好，但是都因为甘，所以唔会抓住每一个机会，话，“喂，你要甘做甘做……”我亦都因为甘而懒得去谂。可能，好似我呢种甘被动既人，是要俾人踢先识郁啦。 

今晚I姐姐继续教我点样抹嘢啊，上菜呀……最重要既是，距指出咗好重要既一点，就是我呢个人其实好无观察力!!是呀!!虽然距话我个时，真是觉得好尴尬，但是，距讲得好岩呀~~~加上最近正上紧Judia既self-understanding workshop，内省次数多咗好多，于是更加觉得自己对人对事既观察力都好低。其实，以前从来唔觉得自己是个甘样既人来咖……但是入咗大学之后，特别是后来果两年，自己好似事事都低调咗好多，同埋越来越钟意将d事简单化，亦都越来越倾向系人地面前摆出个种傻更更既形象……于是真是越来越笨，越来越笨，d思考能力都差晒……唉。 

除咗甘样之外，我亦都发觉，自己做嘢时手脚真是好慢!!是因为第一次出来做嘢既缘故呢？定是我本来就甘？？总之真是想快都快唔到咯，而且越心急越糟糕。好弊呀~~睇来除咗尽量勤力一d，我都无咩办法去弥补自己d缺点……真是暗自庆幸，自己当初拣呢个专业真是拣岩咗，因为好似除咗个专业以外，我真是咩都唔识呀~~~